سوترتما .. روايتي الثانية .. صدرت في معرض القاهرة الدولي للكتاب 2020

اللي بني مصر كان في الأصل...فسخاني!


قبل أن ندخل في نقاشات وجدال حول صحة فرضية عنوان المقال تعالوا نحسبها صح من الأول، من زمااان أوي بالتحديد أيام الفراعنة! عيد شم النسيم ثبت أنه كان فرعوني المنشأ، وطبعاً الفراعنة هم من بنوا مصر وأكيد كانوا يأكلون الفسيخ صح؟ يبقى اللي بني مصر كان في الأصل إيه؟ برااااافو...هو فسخاني!

واليوم الشعب المصري رغم كل معاناته وارتفاع سعر اللحمة والفسيخ طبعاً ناهيك عن باقي الهم والمشاكل اللي عايشنها، أصر هذا الشعب أن يتمسك بعادة الأجداد والاحتفال بنفس الطريقة الفرعونية الأصيلة وعلى رأسها أكل الفسيخ!
وأقولها بكل صراحة أنا لست من أنصار الفسيخ أو السردين أو حتى الرنجة وإن كانت الأخيرة أفضلهم رائحة، إلا أنني احمل موقف عدائي تجاه هذه الأكلات وخصوصاً الفسيخ وشقيقتها الملوحة، إذ أنني كيف يمكن أن أكل سمك في رأيي أصابه العفن وفاحت رائحته! مع احترامي لجماهير الفسيخ العريضة الذين بالتأكيد هيقولوا عليه جاهل فسيخياً بس هي دي الحقيقة.
لكن والله موضوع الفسيخ ده شبيه بالحالة العامة التي يعيشها الشعب المصري الغلبان اللي شايل الهم وصابر ولا بيشتكي ولا بيقول آه، شعب محاط بكل أصناف الابتلاءات من أمراض وسرقة ثروات وارتفاع أسعار وضرائب على كل شكل ولون وحالات فساد ورغم كل هذا فالشعب المصري البطل ماشي ماشي ماشي ولا بيده على رأي سي عبد الحليم حافظ!
وهاهو الشعب المصري يأكل الفسيخ أبو ريحة وحشة وهو يعلم علم اليقين وبالتأكيد سمع آلاف التحذيرات منه ويقف بالطوابير لشراء الفسيخ وإن غلا ثمنه فكله يهون مقابل شمة فسيخ وياسلام بعد أكله وانت تمشي منتشياً تملأ الجو بعبق الفسيخ الجميل.
المصريون لا يأكلون الفسيخ في شم النسيم فقط بل يأكلون الفسيخ على مدار العام وتمضغه أفواههم وتهضمه المعدة رغم به ما به من الميكروبات والسموم، يأكلونه وهم يقولون "الله" ايه الحلاوة دي كمااااان زيدوني فسيخاً زيدوني.
المصريون أحسن شعب يعيش في حالة طناش ويضحك على مشاكله ويسخر منها بل ويصدق نفسه. الحقيقة أن بعض القلة من هذا الشعب تمردت على أكل الفسيخ ويطالبون ببعض من الجاتوه والكريم كراميل الذي يتمتع بهما علية القوم لكن يبدو أن الطريق لازال طويلاً أمام هؤلاء.
نقول إيه الدنيا ربيع والجو فسيخ وكل سنة وأنتو طيبين....

تعليقات

‏قال سَارةٌ
ههههههههه .. إنت واخد موقف عدائي ضد الفسيخ كده ليه ..

انا معاك ان ريحته دي اصلا كفايه .. من غير ما تعرف اضراره ولا كده .. ريحته لوحدها بتكفي .. ممكن تشمها من على بعد 7 امتار ..

واصلا لو نزلت حتى ع الكورنيش تلاقي نفس الريحه ..

بس هنعمل ايه يعني .؟.. يعني شعب مخنوق مطحون زي ده .. هيعمل ايه .؟ .. هيسيب الدنيا ويروح ينتحر ..

اهي مجرد عاده مش أكتر .. الناس بتفرح وتنبسط وتنسى همها فيها ..

على فكره العنـوان جميـل .. فعلا مكنتش فاهماه ف الأول بس هو حلوو بجد ..

وكل سنه وانت طيـب ^_^
‏قال شوارعي
أنا في الحقيقة مش الموقف بشكل فعلي ضد الفسيخ لكن ضد الأوصاع الفسيخية التي نعيشها...هذا هو بيت القصيد
وكل سنة وأنتي طيبة
‏قال غير معرف…
اضم صوتى لصوتك ...هى فعلا اوضاع فسيخية ..بس تفتكر ثورة الجاتوة والكريم كرامل هتنجح ؟ ((:

خالص تحياتى
هبة
‏قال شوارعي
قطعاً سيكون هناك تغيير خاصة وإن استطعنا مرة واحدة أن نذوق طعم الجاتوه الأصلي ويا سلام لو كان بالفانيليا...