مدونة شَوَارِعِي Headline Animator

الأربعاء، 6 أكتوبر، 2010

بأعلى صوت...أنا مصري وأبويا مصري...

بالعامية هكتب...
بالعامية لسان أهل ناس مصر الطيبين...
لسان محمد و حنا وجرجس وحسين...
لسان المهندسين والدكاترة والفلاحين والشيالين...
العامية اللي بيحبها كل اللي مش مصري ويحب يسمعها ويتكلمها ويغني بيها...

بالعامية هأقول أفخر بمصريتي...بالعامية هقول بأعلى صوت أنا مصري وأبويا وجدي أمي مصريين
مصر...مصر اللي لو سمعتوا يا مصريين ذي مسمعت أنا شاب عربي وهو بيقولي "أنا بعشق حاجة اسمها مصر" كنت بجد حسيتوا بلدكو عظيمة قد ايه...

مصر التاريخ والحضارة، مصر الشهامة والبطولة...
مصر اللي انكتب عليها تشيل هم غيرها وتنام تقوم تفكر في هم الناس قبل هموما...
مصر اللي سال دم شبابها ورجالتها علشان التراب والأرض...
مصر اللي يوم مكسرت قيود المحتل منسيتش غيرها وراحت تساعد وتأيد وتساند وتحارب...
مصر اللي ضحت كتير واتجرحت كتير
وكل ده وصابرة وشايلة الحمل ذي الجبل...
لا في يوم قالت كفاية...ولا في يوم قالت وأنا
مالي




وتعرفوا كمان مصر تبقى مين؟
مصر بجد هي المصريين اللي في الشارع
الناس اللي بتجري ورا لقمة العيش كل يوم
الناس المتشعبطة في الأتوبيس ساعة الضهرية والدنيا حر وعرق
مصر بتاع الفول والطعمية
مصر المسحراتي ساعة السحور وطبلته ودقتها في رمضان
مصر زحمة الشارع ليلة العيد
وبنت صغير فرحانة بفستانها الجديد
مصر.. رمل اسكندرية ساعة العصاري والشمس بتبوس مية البحر
وريحة السمك في الحواري وأيووووه على قعدة الكورنيش مع الترمس بالشطة والليمون 


مصر أهل الصعيد الجواني
أهل الشهامة والمروءة والدم الحامي

مصر...
مصر اللي ذي النهارد من 37 سنة داس رجالتها على علم اسرئيل وردوا الكرامة والأرض
قالوا مش هنقدر وقدرنا
قالوا مش هنعبر وعبرنا
قالوا وقالوا وكل اللي عنده كلمة زاد وعاد وحكاها
بس في النهاية
المصري لما قال كلمته
الكل اتخرس
الكل انبهر
الكل قال تعظيم سلام

بس النهارده مالكو كده يا مصريين...
ليه نسيتوا انتو مين
ليه نسيتوا تاريخكو
ليه نسيتوا كل اللي فات كأنه خلاص راح ومات
مع أنه لسه مماتش...لسه عايش جوه كل مصر بيحب بلده
يمكن التراب يكون غطاه شوية
بس لازم ننفض التراب ونفوق ونحب بلدنا أكتر وأكتر
ساعتها بس بلدنا دي هتبقى حاجة تانية

حب بلدكو يا مصريين
حب بلدكو يا مصريين يعني لا للسلبية
لا للخضوع والخنوع والرضا باللقمة المتغمسة بالذل

حب بلدكو يا مصريين يعني اللمة والوقفة ايد في ايد
حب بلدكو يعني نقول للغلط غلط ونقول للصح صح
حب بلدكو انكوا تخافوا عليها وترجعولها حقها
حب بلدكو حاجات كتير أوي مش ممكن أقولها كلها بس أهمها انكو تكونوا بجدا مصريين ذي اللي قبلكوا مكانوا
لو مش عارفين إزاي...
يبقى مفيش فايدة من الكلام!




هناك تعليقان (2):

Hala Gabr يقول...

الحقيقة أنا كنت مستنية أشوف حضرتك هتكتب ايه بالمناسبة دي ,, عجبتني اوي بالذات الجزء الأخير نفسي يبقى عندنا انتصار دلوقت مش نفضل دايما عايشين على زمان ,, كل حاجة زمان حضارة ورانتصار وعلم ودلوقت ايه ,, للاسف ي ما رجعت اسرائيل جوه سينا تاني بس بالقوى الناعمة برجال الأعمال وتحس ان سينا اصلا مش مصرية تقعد فيها زي الغريب ,, لازم بردو يكون لينا انتصار كده بالعلم بالعدل بالحرية ,, الذكرى عندنا بقت بافلام الحرب والأغاني وصور السيد الرئيس بقت مجرد اسطوانات مش حاسينها اسفة على مسحة السواد دي

شوارعي يقول...

كلامك طبعاً صحيح بس مش لازم نستسلم للإحباط واليأس وصدقني قوة القلم والكلمة أقوى من أي سلاح وبيتعملها ألف حساب وأكبر دليل لسه حاصل هو إقالة إبراهيم عيسى رئيس تحرير الدستور...

مستهونيش بسلاح القلم بتاعك وحتى لو محصلش شيءبس في النهاية هتحسي براحة ضمير إنك قلتي كلمتك

Related Posts Plugin for WordPress, Blogger...
جميع المواد والمواضيع المنشورة هنا تخضع لحقوق الملكية الفكرية للمؤلف وأي تعدي على تلك الحقوق بإعادة النشر أو الطبع أو بأي شكل من الأشكال يعرض صاحبه للمسائلة القانونية.
copyrights © shawar3ymasry