مدونة شَوَارِعِي Headline Animator

الخميس، 4 يوليو، 2013

عن خارطة الطريق... اعمل نفسك عبيط!



ليس كلامي ولكن أعجبني...



سمعت انكم فى مصر عملتم ثورة وشلتم الجدع بتاع الاخوان ده ؟
- اسكت يا جدع ده كان كابوس
- ليه بس كده ؟
- أصله كان مدى رجالته كل المناصب فى كل حتة بقى مش مهم الكفاءة المهم الثقة
- طيب وشيلتوه ازاى لما هومسيطر قوى كده ؟
- اسكت ده الشعب كله نزل والجيش كان معنا والشرطة كانت معنا والقضاء رجع النائب_العام والاعلام كان بيجيب مظاهراتنا احنا بس والوزراء استقالوا واعضاء مجلس الشورى استقالوا .. كانت هيصة !
- ايه ده يعنى رجالته باعوه ؟
- لا ما هو دول ماكانوش رجالته
- انت يابنى مش بتقول انه حط رجالته فى كل حتة ؟
- اه ده كان مأخون البلد ! الحمد لله انه غار !
- طب وجبتوا مين مكانه ؟


- جبنا رئيس المحكمة الدستورية .. رجل كبارة كده
- جبتوا رئيس المحكمة الدستورية اللى يعتبر أعلى سلطة قضائية واديتوه السلطة التنفيذية
- اه
- طب هو صح كده انكم تخلوه مسيطر على السلطة التنفيذية والقضائية مع بعض ؟
- لا ما هو جاى فترة نتقالية بس
- فترة قد ايه يعنى ؟
- ايه ؟ لا مش عارف بس ان شاء الله مش كثير يعنى
- يعنى شهر ؟ سنة ؟ عشر سنين ؟
- لا ما احنا ما دخلناش فى الديتيلز دى
- وعلى كده بقى سيبتوا مجلس الشورى زى ما هو
- لا يابا اتشال طبعا دى ثورة امال ايه ؟
- طب وكده السلطة التشريعية مع مين ؟
- معاه هو برضه !
- هو مين ؟ رئيس الدستورية ؟
- اه الكبارة ده !
- يعنى كده الكبارة ده معه السلطة لقضائية والتنفيذية والتشريعية ؟ مع بعض ؟؟؟
- اه بس لفترة انتقالية بس ما انا قلت لك
- طب وافرض الرجل الكبارة ده بالسلطات اللى معاه قرر يطلع قوانين تخليه يفضل متبت فى السلطة هتعملوا ايه ؟
- لا ما يقدرش !
- ليه يعنى ؟
- علشان الجيش مش هيسيبه .. ما هو اللى جايبه
- قلت لى .. يعنى من الاخر كده السلطات الثلاثة دول بقوا فى ايد لجيش دلوقتى
- مش بالضبط اصل الجيش قال لنا انه مش عايز يحكم وانه ده مش انقلاب_عسكرى
- وانتم صدقتوه ؟
- اه وهو الجيش بتاعنا هيضحك علينا يعنى ؟؟
- لا طبعا ما يصحش
- انا كده اطمنت انه الثورة بتاعتكم نجحت .. بالشفا !

ليست هناك تعليقات:

Related Posts Plugin for WordPress, Blogger...
جميع المواد والمواضيع المنشورة هنا تخضع لحقوق الملكية الفكرية للمؤلف وأي تعدي على تلك الحقوق بإعادة النشر أو الطبع أو بأي شكل من الأشكال يعرض صاحبه للمسائلة القانونية.
copyrights © shawar3ymasry